മാഷ് പരീക്ഷാ ഡ്യൂട്ടി കഴിഞ്ഞ് വീട്ടില്‍ എത്തിയതേയുള്ളൂ
അപ്പോഴേക്കും മാഷിന്റെ മൊബൈല്‍ ഫോണ്‍ ശബ്ദിച്ചു
മാഷ് ഫോണെടുത്തു
“മാഷ് വീട്ടിലെത്തിയോ ?”
“മാഷിന് ആളെ പിടികിട്ടി . കുസൃതിക്കുട്ടനാണ് .
കുസൃതിക്കുട്ടന്‍ പരീക്ഷ എഴുതിക്കഴിഞ്ഞതിന്റെ ആവേശത്തില്‍ ഫോണ്‍ വിളിക്കുന്നതാണ് .
“ എങ്ങനെയുണ്ട് പരീക്ഷ ?”
മാഷ് കുസൃതിക്കുട്ടനോട് പരീക്ഷയെക്കുറിച്ച് ചോദിച്ചു
“ ചോതി ചതിച്ചു മാഷേ “
“ ചോതി ...........”
മാഷ് മനസ്സിലാകാത്ത മട്ടില്‍ പറഞ്ഞു
തുടര്‍ന്ന് കുസൃതിക്കുട്ടന്റെ ചോദ്യം മാഷിനോടായി
“ ചോതി നക്ഷത്രത്തിന്റെ നിറമെന്താ മാഷേ “
മാഷിന് പെട്ടെന്ന് ഉത്തരം പറയാന്‍ പറ്റിയില്ല
വീണ്ടും അവന് ആ ചോദ്യം ചോദിച്ചു
മാഷ് പെട്ടന്നു തന്നെ മേശപ്പുറത്തിരുന്ന ഫിസിക്സ് ടെക്സ്റ്റ് ഒന്നു പരതി
മാഷ് ഉത്തരം പറഞ്ഞു
“ ഓറഞ്ച് “
“ പക്ഷെ എനിക്ക് ആ ഉത്തരം തെറ്റിപ്പോയി മാഷേ . ഞാന്‍ ചുവപ്പ് എന്നാ എഴുതിയത് “
“ സാരമില്ല്യ വിഷമിക്കേണ്ട. എന്നിരുന്നാലും ഒരു മാര്‍ക്കല്ലേ പോയുള്ളൂ . മുപ്പത്തിഒന്‍പത് മാര്‍ക്ക് കിട്ടിയാലും എ പ്ലസ് തന്ന്യാ “ മാഷ് ആശ്വസിപ്പിച്ചു
പിന്നെ ബാക്കിയുള്ള ചോദ്യങ്ങള്‍
“ കുഴപ്പമില്ല മാഷേ “
“ എന്നാലും ചില എതിര്‍പ്പുകള്‍ ഉണ്ട് “
അവന് ഗൌരവത്തില്‍ പറഞ്ഞു
“ എന്താണാവോ ഈ എതിര്‍പ്പ് “
മാഷ് പരിഹാസ രൂപേണ പറഞ്ഞു
“ ഒരു ആണ് കുട്ടിയുടേയും പെണ്‍കുട്ടിയുടേയും ശബ്ദം വേര്‍തിരിച്ചറിയുത് ശബ്ദത്തിന്റെ ഏത് സവിശേഷത മൂലമാണ് എന്ന ചോദ്യം അല്പം
പ്രശ്നമാണ് മാഷേ “
“ എന്തു പ്രശ്നം ? സ്വനതന്തുവിന്റെ കാര്യവും ഉയര്‍ന്ന ശ്രുതി ശബ്ദവും താഴ്ന്ന ശ്രുതി ശബ്ദത്തിന്റെ കാര്യവും ഞാന്‍ പറഞ്ഞീട്ടുള്ളതല്ലേ “
“പക്ഷെ , പ്രായപൂര്‍ത്തിയാകുന്നതോടെയല്ലേ സ്വനതന്തുവിന്റെ വളര്‍ച്ച ആണ്‍കുട്ടികളില്‍ വേഗത്തിലാകുന്നത് “
“ അതൊന്നും പറഞ്ഞീട്ട് കാര്യമില്ല കുസൃതിക്കുട്ടാ , ഇത് ശ്രുതിയുടെ അപ്ലിക്കേഷന്‍ ലെവലിലുള്ള ചോദ്യമാണ് . അതിനു താഴെയുള്ളത്
ഗുണത്തിന്റേയും “
“ ഞാനും പ്രായോഗികമായിട്ടുള്ള കാര്യം തന്നെയാ പറയുന്നത് . എല്ലാ ആണ് കുട്ടികളിലും സ്വനതന്തുവിന്റെ വളര്‍ച്ച ഒരേപോലെ
ആയിരിക്കണമെന്നില്ല കേട്ടോ “
“ഇങ്ങനെയൊക്കെ ചിന്തിക്കുന്നത് ശരിയല്ലേ കേട്ടോ “
:“ മാഷു തന്നെയല്ലേ പറഞ്ഞീ‍ട്ടുള്ളത് , ഒരു വേറിട്ട ചിന്ത എപ്പോഴും നല്ലതാണെന്ന് . എന്നീട്ട് ഇപ്പോ ... എങ്കിലും ഞാന്‍ ഒന്നു ചോദിക്ക്യാ ... നമ്മുടെ ക്ലാസിലെ ആണ്‍കുട്ടികളുടെ കാര്യം തന്നെയെടുക്ക് . എത്ര കുട്ടികള്‍ക്ക് പരുപരുത്ത ശബ്ദമുണ്ട് ?”
“ അതൊക്കെ എനിക്ക് എങ്ങന്യാ അറിയാ “ എന്നായി മാഷ്
“അന്ന് മാഷ് ഈ ക്ലാസ് എടുത്തശേഷം ഇന്റര്‍വെല്‍ സമയത്ത് ക്ലാസിലെ പല കുട്ടികളേയും കളിയാക്കിയിരുന്നു .പരുപരുത്ത ശബ്ദം ഇല്ലാത്ത ആണ്‍കുട്ടികളൊക്കെ സ്വനതന്തുവില്‍ എന്തോ ഒരു പ്രശ്നം ഒക്കെ ഉണ്ട് എന്ന് പറഞ്ഞ് .അതു പോട്ടെ . .ഇവിടെ ചോദ്യത്തില്‍ ആണ് കുട്ടിയും
പെണ്‍കുട്ടിയും പത്താംക്ലാസില്‍ പഠിക്കുന്നവരാണെന്നൊന്നും പറഞ്ഞിട്ടില്ലെ . ഇവര്‍ നാലാം ക്ലാസില്‍ പഠിക്കുന്ന കുട്ടികളാണെങ്കില്‍ ശബ്ദവ്യത്യാസം
ഉണ്ടാകുമോ ?
ഇത് മഹാ തൊന്തരവ് ആയല്ലോ മാഷ് കരുതി
“ അതൊക്കെ പോകട്ടെ , മറ്റ് ചോദ്യങ്ങള്‍ എങ്ങനെയുണ്ട് “
മാഷ് വിഷയം മാറ്റി
“ മാഷേ ചുവന്ന മഷികോണ്ട് ഫിസിക്സ് എന്ന് എഴുതിയ ചോദ്യത്തെക്കുറിച്ച് മാഷിന്റെ അഭിപ്രായമെന്താ ?”
“ അത് നല്ല ചോദ്യമാണ് .അപ്ലിക്കേഷന്‍ ലെവല്‍ തന്നെ “
മാഷ് സന്തോഷത്തോടെ പറഞ്ഞു
“ സൈദ്ധാന്തികമായി നീല മഷിയില്‍ കെമിസ്‌ട്രി എന്ന് എഴുതിയതാണ് ഉത്തരമെങ്കിലും അപ്ലിക്കേഷന്‍ ലെവലില്‍ അതിലും സംശയം ഉണ്ട് “
“ എന്ത് ........? ”
“ മാഷ് വേണമെങ്കില്‍ ഇപ്പോ ചെയ്തുനോക്കിക്കോ . വെള്ള പേപ്പറില്‍ ചുവന്ന മഷികൊണ്ടും നീല മഷികൊണ്ടും വരയിട്ടോ . ചുവന്ന ലൈറ്റ് അടിച്ചോ
.. ... അപ്പോ കാണാം കാര്യം “
മാഷ് ഒന്നും മിണ്ടിയില്ല
ഇതുതന്നെ താപ്പെന്നു കരുതി കുസൃതിക്കുട്ടന്‍ വിണ്ടും ആക്രമിച്ചു
“ ഞങ്ങള്‍ ഇത് ചെയ്തു നോക്കിയപ്പോള്‍ രണ്ടുവരകളും കണ്ടു ”
അതൊക്കെ ഇപ്പോ എന്തിനാ പറയുന്നത് എന്നായി മാഷ്
കുസൃതിക്കുട്ടന്‍ പറഞ്ഞു
“ ഇതുപോലെ കറുത്ത ബാഗില്‍ പച്ച പ്രകാശമുള്ള ടോര്‍ച്ച് അടിച്ച് മാഷ് ക്ലാസില്‍ കാണിച്ചൂതന്നില്ലേ . കറുപ്പ് എല്ലാ നിറങ്ങളെയും ആഗിരണം
ചെയ്യുമെങ്കിലും പച്ച നിറത്തെ പ്രതിഫലിപ്പിച്ചില്ലേ . ഈ ചോദ്യം ചോദ്യം കണ്ടപ്പോള്‍ അക്കാര്യം ഓര്‍ത്തുപോയി “
ഉം മാഷ് മൂളി
“ ലൌഡ് സ്പീക്കര്‍ മോട്ടോര്‍ തത്ത്വവും ട്രാന്സ്ഫോമര് മ്യൂച്ചല്‍ ഇന്‍ഡക്ഷന്‍ തത്ത്വവുമെന്നാ മാഷ് പഠിപ്പിച്ചൂ തന്നേ “
“ എന്നീട്ട് ............” മാഷ് ചോദിച്ചു
“ എങ്കിലും ഞാന്‍ എഴുതിയത് ലൌഡ് സ്പീക്കറാ “
മാഷ് വീണ്ടും നീട്ടി മൂളി
“ ഫ്യുസ് ഒള്ളോണ്ട് അത് ഫേസ് ലൈന്‍ എന്ന് പറയാമെങ്കിലും എര്‍ത്ത് ലൈന്‍ എന്ന് ഉത്തരമെഴുതാന്‍ കുറേ കഷ്ടപ്പെടേണ്ടിവരും മാഷേ .
സെക്ഷന്‍ ഫ്യൂസുകളിലും ഡോട്ടഡ് ലൈനാ കൊടുത്തിരിക്കുന്നത് “
പിന്നെ മാഷ് ചോദിച്ചു
“ ചെല ചോദ്യം കണ്ടപ്പോ മൈ ഡിയര്‍ കുട്ടിച്ചാത്തന്റെ കാര്യം ഓര്‍മ്മ വന്നു . ത്രീ ഡി സിനിമ ടുഡിയില്‍ കാണുന്നതുപോലെ . ആര്‍മേച്ചര്‍ , ഇടതുകൈ നിയമം എന്നിവയൊക്കെ ത്രീ ഡി ചോദ്യമാ അതൊക്കെ ടു ഡിയില്‍ തന്നാ എങ്ങനെയിരിക്കും മെന്നാ “
“ നീ ഇങ്ങനെ പറയാതെ മൊത്തത്തില്‍ കാര്യം പറാ ”
“ അത് എ പ്ലസ് കിട്ടും മാഷേ ”
“ കൂട്ടുകാര്‍ക്കോ ”
“ അവര്‍ക്കും കിട്ടും ”
“ അപ്പോള്‍ ............... ”
“ യാ ............. ഹൂ “ കുസൃതിക്കുട്ടന്‍ മൊഴിഞ്ഞു
“ മാഷേ , ഒരു സ്വകാര്യം പറയട്ടെ ”
“ ങാ പറയൂ ”
മാഷിന് ധൃതിയായി
“ കുട്ട്യോളെ എന്തിനാ ഇങ്ങനെ ചോദ്യം ചോദിച്ച് വലക്കുന്നേ അല്ലെങ്കില്‍ പീഡിപ്പിക്കുന്നേ “
‘ യേയ് ഇത് വലക്കുകയല്ല , പ്രായോഗികതലത്തില്‍ അവരുടെ നിലവാരം എങ്ങനെയുണ്ടെന്ന് അറിയുകയാ ചെയ്യുന്നേ . അവരെ പ്രായോഗിക
തലത്തിലേക്ക് എത്തിക്കുവാന്‍ പരിശീലിപ്പിക്കുകയാണ് ചെയ്യുന്നേ “
“ ഇതു തന്ന്യാ റാഗിങുകാരു പറയുന്നേ “
ഇനി ഇവനോട് സംസാരിച്ചിട്ട് കാര്യമില്ല എന്ന് മനസ്സിലാക്കിയതുകൊണ്ടാവാം മാഷ് ഫോണ്‍ കട്ട് ചെയ്തു
* * * ** *** *** *** ** *** **** ***** ** *** ***** **** *** ***
* * * ** *** *** *** ** *** **** ***** ** *** ***** **** *** ***
* * * ** *** *** *** ** *** **** ***** ** *** ***** **** *** ***
* * * ** *** *** *** ** *** **** ***** ** *** ***** **** *** ***
പിറ്റേന്ന് സുപ്രഭാതം
മാഷ് പൂമുഖത്തിരുന്ന് ചായ ആസ്വദിച്ചു കുടിക്കുകയായിരുന്നു
അപ്പോള്‍ മുറ്റത്ത് മോട്ടോര്‍ സൈക്കിളില്‍ ഒരാള്‍ വന്നു
മാഷ് ആഗതനോട് ഇരിക്കാന്‍ പറഞ്ഞു
അയാള്‍ കസേരയിലിരുന്ന് മാഷിന്റെ ഗൌരവത്തില്‍ നോക്കി
“ എന്താ വന്നത് മാഷ് ചോദിച്ചു
“മാഷെ ഈ വീട്ടില്‍ ഹീറ്ററുണ്ടോ ? ”
മാഷിന് കാര്യം മനസ്സിലായില്ല
അതിനാല് മാഷ് അത്ഭുതത്തോടെ ചോദിച്ചൂ
“ ഉണ്ടെങ്കില്‍ ........ ”
മാഷിന് സംശയം തോന്നി .
ഇയാല്‍ കെ എസ് ഇ ബി യിലെ വിജിലെന്‍സ് സെല്ലില്‍ നിന്നോ മറ്റോ ആണോ
അമിതമായി കറന്റ് ഉപയോഗിക്കുന്നതിനെക്കുറിച്ച് ആരെങ്കിലും പരാതി കൊടുത്തീട്ടുണ്ടോ ?
ആഗതന്റെ ഉച്ചത്തിലുള്ള ചോദ്യം കേട്ടാവണം മാഷിന്റെ ഭാര്യയും പൂമുഖത്തെത്തിയിട്ടുണ്ട്
അടുക്കളയില്‍ അവള്‍ ചിലപ്പോള്‍ ഹീറ്റര്‍ ഉപയോഗിക്കാറുണ്ട്
അത് വല്ല പ്രശ്നമായോ എന്ന ഭയത്തിലാണ് അവള്‍ നില്‍ക്കുന്നത്
“സര്‍ കെ എസ് ഇ ബി യില്‍ നിന്നാണോ ? ”
“ഞാന്‍ അവിടെ നിന്നൊന്നുമല്ല ”
“പിന്നെ ”
“ഞാന്‍ ................ കോച്ചിംഗ് സെന്ററിലെ ട്യൂഷന്‍ മാഷാണ് ? ”
അപ്പോള്‍ മാഷ് ഒരു പിടുത്തം കിട്ടാത്ത മട്ടില്‍ ചോദിച്ചു
“ടൂഷന്‍ മാഷും ഹീറ്ററും തമ്മിലെന്താ ബന്ധം ? ”
ഇപ്പൊള്‍ മാഷിന്റെ മുഖത്ത് പരിഹാസം
അല്ലാ മാഷിന്റെ ഈ വീട്ടില്‍ ഹീറ്ററുണ്ടോ എന്ന എന്റെ ആദ്യത്തെ ചോദ്യത്തിന് ഉത്തരം പറയ് ”
ഇപ്പോള്‍ ട്യൂഷന്‍ മാഷ് കടുപ്പിച്ചാണ്
“ ഉണ്ടെങ്കില്‍ എന്നായി മാഷ് ”
“അതില്‍ ഡയോഡുണ്ടോ എന്നായി ട്യൂഷന്‍ മാഷ് ”
മാഷിന്റെ മുഖത്ത് പുഞ്ചിരി വിടര്‍ന്നു
പത്താം ക്ലാസിലെ ഫിസിക്സ് ചോദ്യപേപ്പറിന്റെ ഹേങ് ഓവറിലാണ് ഇഷ്ടനെന്ന് മാഷിനു മനസ്സിലായി
“അതിപ്പോ ഒരു അപ്ലിക്കേഷന്‍ ലെവലിലൊരു ചോദ്യം ചോദിച്ചതാ ”
മാഷ് ന്യായീകരിച്ചു
മാഷിന്റെ ഭാര്യ അടുക്കളയിലേക്ക് തിരിച്ചുപോയി
“പക്ഷെ ഇത് പാഠപുസ്തകത്തില്‍ ഇല്ലല്ലോ എന്നായി ട്യൂഷന്‍ മാഷ് ”
“ഇല്ലെന്ന് പറയാന്‍ പറ്റില്ല ”
മാഷ് ഗൌരവത്തില്‍ പറഞ്ഞു
“രണ്ട് അദ്ധ്യായങ്ങളിലെ ആശയങ്ങളെ തമ്മില്‍ ബന്ധിപ്പിച്ച് ഒരു ചോദ്യം ഉണ്ടാക്കിയിരിക്കുന്നു എന്നു മാത്രം ”
“മാഷേ ഒരു സര്‍ക്യൂട്ട് ആയാല്‍ ഒരു സ്വിച്ച് വേണ്ടെ ”
“അത് ഈ ചിത്രത്തിലുണ്ടോ ”
മാഷ് ഒന്നും മിണ്ടിയില്ല
“ഇനി പോട്ടെ ഇത് എ സി വോള്‍ട്ടേജാണെന്ന് വ്യക്തമാക്കുന്ന സിഗ്‌നലിന്റെ ചിത്രം .... അതും വ്യക്തമല്ല ”
മാഷ് ഒന്നും മിണ്ടിയില്ല
“ഇങ്ങനെയുള്ള സര്‍ക്യൂട്ട് ഏതിലാണ് ഉപയോഗിക്കുന്നത് ? ”
മാഷ് അതിനും ഉത്തരം പറഞ്ഞില്ല
“ഹാഫ് വേവ് റക്ടിഫിക്കേഷന്റെ ഒരു സൂചനപോലും കുട്ടികള്‍ക്ക് കിട്ടിയില്ല ”
“അത് ശരിയല്ല ” മാഷ് ഉടനെ പ്രതികരിച്ചു
“അത്തരമൊരു സൂചനക്കാണ് ഡയോഡിന്റെ പ്രതീകം കാണിച്ച് അത് ഏതിന്റെ പ്രതീകമാണെന്ന ചോദ്യം തന്നെ ചോദിച്ചത് ”
“മാഷ് ഇത്തരത്തില്‍ രണ്ട് വ്യത്യസ്ത ആശയങ്ങളെ തമ്മില്‍ ബന്ധിപ്പിക്കുന്ന ചോദ്യം കുട്ടികളെ പഠിപ്പിച്ചീട്ടുണ്ടോ ? ”
മാഷ് ഇല്ല എന്ന് ഉത്തരം പറഞ്ഞു
“മാഷ് എന്നല്ല മറ്റ് സ്കൂളുകളിലെ ആരും തന്നെ ഇത്തരത്തില്‍ പഠിപ്പിച്ചിട്ടില്ല ”
“പരീക്ഷ കഴിഞ്ഞ ഉടനെ ............... സ്കൂളിലെ എന്റെ ഒരു സ്റ്റുഡന്റ് ചോതി നക്ഷത്രത്തിന്റെ നിറമെന്താണെന്ന് അവന്റെ ഫിസിക്സ് ടീച്ചറോട്
ചോദിച്ചപ്പോള്‍ ആ ടീച്ചര്‍ പറഞ്ഞത് ടീച്ചര്‍ക്ക് അറിയില്ലാന്നാണ് . ഇങ്ങനെ ടീച്ചര്‍മാര്‍ക്ക് അറിയാത്ത ചോദ്യങ്ങള്‍ പരീക്ഷക്ക്
വന്നാലെങ്ങന്യാ ? ”
ട്യൂഷന്‍ മാഷ് മുട്ടിപ്പായി പറഞ്ഞു
മാഷ് ചോദ്യത്തിന്റെ പാറ്റേണ്‍ വിശദീകരിച്ചു
“ ഇപ്പോഴത്തെ ചോദ്യപേപ്പറുകള്‍ക്ക് ഒരു പ്രത്യേകതയുണ്ട് . ഒരു തവണ ചോദിച്ച ചോദ്യങ്ങള്‍ വീണ്ടും ചോദിക്കില്ല . പണ്ടൊക്കെ ഇന്നയിന്ന ചോദ്യങ്ങള്‍ പ്രധാനപ്പെട്ട ചോദ്യങ്ങളാണ് അവ N.B ഇട്ട് മാഷന്മാര്‍ കുട്ടികളെ പഠിപ്പിക്കുമായിരുന്നു. ഇപ്പോള്‍ അത്തരം രീതികള്‍ കുട്ടികളെ
പഠിപ്പിക്കുന്നില്ല. അങ്ങനെ പ്രധാനപ്പെട്ട ചോദ്യങ്ങള്‍ ഇല്ല എന്നല്ല , മറിച്ച് പാഠപുസ്തകത്തിലെ എല്ലാ കാര്യങ്ങളും പ്രധാനപ്പെട്ടതാണ് . പിന്നെ ഇന്ന ഭാഗം പ്രധാനപ്പെട്ടതെന്നും ഇന്ന ഭാഗം അപ്രധാനമെന്നും ചിലപ്പോള്‍ അദ്ധ്യാപകര്‍ക്കും വിദ്യാര്‍ത്ഥികള്‍ക്കും ചിലപ്പോള്‍ തോന്നിയേക്കാം . ഇത് ഒരു തെറ്റിദ്ധാരണയാണ് . അത് ഒരു മുന്‍‌വിധി മാത്രമാണ് . ഞാന്‍ ഇത്രക്കും വിശദമാക്കിയത് ചോദ്യരീതിയിലുണ്ടായ മാറ്റം മനസ്സിലാക്കിത്തരുന്നതിനുവേണ്ടിയാണ് . ഇത് അദ്ധ്യാപകര്‍ക്ക് പരിശീലന വേളകളില്‍ വ്യക്തമാക്കികൊടുത്തീട്ടുള്ളതാണ് . അവര്‍ വഴി ക്ലാസ് പി ടി എ യില്‍ പങ്കെടുക്കുന്ന രക്ഷിതാക്കള്‍ക്കും മനസ്സിലാക്കിക്കൊടുത്തീട്ടുണ്ട് . ഇപ്പോള്‍ തോന്നുന്നു ഇവര്‍ക്കു മാത്രമല്ല , മറിച്ച് അനൌദ്യോഗിക വിദ്യാഭ്യാസപ്രവര്‍ത്തകരായ ട്യൂഷന്‍ മാഷന്മാര്‍ക്കും ഇത്തരത്തില്‍ പരിശീലനം നല്‍കേണ്ടതാണെന്ന് .”
ട്യൂഷന്‍ മാഷ് അല്പ നേരം മിണ്ടാതിരുന്നു.
എന്നീട്ടു പറഞ്ഞു “ ഈ അപ്ലിക്കേഷന്‍ ലെവലാണ് മാഷേ കുട്ടികളെ ചതിക്കുന്നത്. അത്തരത്തിലുള്ള ചോദ്യങ്ങള്‍ ഒഴിവാ‍ക്കിക്കൂടെ “
“ അതെങ്ങനെ ഒഴിവാക്കാന്‍ പറ്റും . ഫിസിക്സ് എന്ന വിഷയം തന്നെ സാങ്കല്പിക തലത്തിലാണല്ലോ പഠനവ്യാപാരങ്ങള്‍ പലതും ഉള്‍ക്കൊള്ളുന്നത് “
“ അതല്ലെ നമ്മള്‍ പഠനകാലത്ത് പറയാറ് . അങ്ങനെ ഇങ്ങനെ ആയാല്‍ ഇങ്ങനെയും അങ്ങനെയും ആവും . അങ്ങനെ ഇങ്ങനെയും
അങ്ങനെയും മായാല്‍ എങ്ങനെയാവും എന്നൊക്കെ ..........”
“ അതുപോകട്ടെ “ട്യൂഷന്‍ മാഷ് മുട്ടു മടക്കാതെ പറഞ്ഞു
“അപ്ലിക്കേഷന്‍ ലെവലിലാണ് ചോദ്യങ്ങള്‍ ചോദിക്കുക എന്നു പറയുന്നു . എങ്കില്‍ അത്തരത്തിലുള്ള മാതൃകാ ചോദ്യങ്ങള്‍ നല്‍കി കുട്ടികളെ
പരിശീലിപ്പിച്ചു കൂടെ ”
‘ അത് സാദ്ധ്യമല്ല “ മാഷ് കട്ടായമായി പറഞ്ഞു
“ എന്തുകൊണ്ട് സാദ്ധ്യമല്ല “ ട്യൂഷന്‍ മാഷ് രൂക്ഷമായി ചോദിച്ചു
“ ഉദാഹരണമായി പറഞ്ഞാല്‍ ......... ഞാന്‍ ഈ പറയുന്ന ചോദ്യം രണ്ടാം ക്ലാസിലോ മൂന്നാം ക്ലാസിലോ ഒക്കെ നാം കേട്ടീട്ടുള്ളതാണ് . എങ്കിലും ഞാന്‍ ഈ ചോദ്യം ഇവിടെ വീണ്ടും പറയട്ടെ . രണ്ടാം ക്ലാസിലെ ടീച്ചര്‍ കുട്ടികളോട് ഒരു ചോദ്യം ചോദിച്ചു, ഒരു വൈദ്യുത തീവണ്ടി തെക്കുനിന്ന് വടക്കോട്ട് പോകുന്നു . കാറ്റ് വടക്കുനിന്ന് തെക്കോട്ട് വീശുന്നു . എന്നാല്‍ തീവണ്ടിയുടെ പുക ഏതു ദിശയിലായിരിക്കും ? കുട്ടികളില്‍ ഏതാനും ചിലര്‍ മാത്രമായിരിക്കും ഇലക് ട്രിക് ട്രെയിനിന് പുകയുണ്ടാവില്ല എന്ന് ഉത്തരമെഴുതുക . എന്നാല്‍ ടീച്ചര്‍ ഈ ഉത്തരം ക്ലാസില്‍ പറഞ്ഞ് വീണ്ടും
വേറെ ഒരു ചോദ്യം ചോദിക്കുകയാണെന്ന് വിചാരിക്കുക . ഒരു വൈദ്യുത തീവണ്ടി കിഴക്കു നിന്ന് പടിഞ്ഞാറോട്ട് പോകുന്നു . കാറ്റ് പടിഞ്ഞാറു നിന്ന് കിഴക്കോട്ട് വീശുന്നു . എന്നാല്‍ തീവണ്ടിയുടെ പുക ഏതു ദിശയിലായിരിക്കും ? ഇപ്പോള്‍ കുട്ടികള്‍ എല്ലാവരും തന്നെ ഇലക് ട്രിക്
ട്രെയിനിന് പുകയുണ്ടാവില്ല എന്ന ഉത്തരം എഴുതിയിരിക്കും . എന്നുവെച്ചാല്‍ ഇത്തരത്തിലുള്ള ചോദ്യങ്ങള്‍ ഒരു പ്രാവശ്യം മാത്രമേ ഉപയോഗിക്കാന്‍ പറ്റൂ . ഇവ ഡിസ്‌പോസിബിള്‍ ആണ് . ആദ്യപ്രാവശ്യത്തോടെ അവയുടെ മൂല്യം പ്രസ്തുത പരീക്ഷയെ സംബന്ധിച്ച് അസ്തമിക്കുന്നു . ഇനി വേറൊരു പ്രശ്നം എന്താണെന്നുവെച്ചാല്‍ അപ്ലിക്കേഷന്‍ ലെവലിലുള്ള ചോദ്യങ്ങള്‍ നിര്‍മ്മിക്കാനുള്ള സര്‍ഗ്ഗാത്മകമായ ബുദ്ധിമുട്ടാണ്“
ട്യൂഷന്‍ മാഷ് മൌനത്തിലായി
അതിനാല് മാഷ് വീണ്ടും തുടര്‍ന്നു
“ നിങ്ങളുടെ പ്രദേശത്ത് വോള്‍‌ട്ടേജിന്റെ കുറവ് അനുഭവപ്പെടുന്നു എന്ന് വിചാരിക്കുക . അവസാനം അവിടത്തെ ട്രാന്സ്ഫോമര് മാറ്റിവെക്കാന്‍ കെ എസ് ഇ ബി തീരുമാനിച്ചു എങ്കില്‍ അവിടെ എത് ട്രാന്സ്ഫോമര് ആയിരിക്കും കെ എസ് ഇ ബി വിതരണ ട്രാന്സ്ഫോമര് ആയി കെ
എസ് ഇ ബി വെക്കുക . സ്റ്റെപ് ട്രാന്‍സ്‌ഫോമറോ സ്റ്റെപ് ഡൌണ്‍ ട്രാന്‍സ്‌ഫോമറോ ? ഇത് ഇത്തരത്തില്‍‌പെട്ട ചോദ്യമാണ് .
അതുപോലെ , പ്രൈമറി കോയിലിന്റെ ഇരട്ടി ചുറ്റുകള്‍ സെക്കന്‍‌ഡറിയില്‍ ഉള്ള ഒരു സ്റ്റെപ് അപ് ട്രാന്‍സ്‌ഫോമറില്‍ ഇന്‍പുട്ടായി 6 വോള്‍ട്ട് ഡി സി കൊടുത്താല്‍ ഔട്ട് പുട്ട് വോള്‍ട്ടേജ് എത്രയായിരിക്കും ? “
“ മനസ്സിലായോ “ മാഷ് ചോദിച്ചു
“ മനസ്സിലായിക്കൊണ്ടിരിക്കുന്നു “ ട്യൂഷന്‍ മാഷ് ക്ഷീണിച്ച സ്വരത്തില്‍ പറഞ്ഞു
“ ഇനിയുമുണ്ടോ ഇത്തരം ചോദ്യങ്ങള്‍ “ ടൂഷന്‍ മാഷ് ആകാംക്ഷയോടെ ചോദിച്ചു
“ ഇതൊക്കെ ഓരോ അദ്ധ്യാപകനും വിചാരിച്ചാല്‍ ഉണ്ടാക്കാവുന്നതേയുള്ളൂ . സൂര്യഗ്രഹണ സമയത്ത് ചന്ദ്രനില്‍ നിന്നു നോക്കുമ്പോള്‍ കാണുന്ന സുര്യന്റെ ഭാഗം ഏത് ?”
ട്യൂഷന്‍ മാഷ് മാഷിനെ തറപ്പിച്ചു നോക്കി . പെട്ടെന്ന് അയാളുടെ മുഖത്തിന്റെ ദൈന്യത അപ്രത്യക്ഷമായി
“ ഞാനും ഇങ്ങനെയുള്ള കുറച്ചു ചോദ്യങ്ങള്‍ പറഞ്ഞു തരട്ടെ മാഷേ “
“ പറയൂ ‘ മാഷ് പ്രോത്സാഹിപ്പിച്ചു
ട്യൂഷന്‍ മാഷ് പറഞ്ഞു
“ ചന്ദ്രനിലെ മഴവില്ലിന്റെ നിറമെന്ത് ?
നിലാവെളിച്ചം ഒരു പ്രിസത്തിലൂടെ കടത്തിവിട്ടാല്‍ ഏതുതരം സ്പെക് ട്രമാണ് ലഭിക്കുക
ശബ്ദമലിനീകരണം കൊണ്ടുള്ള ഗുണങ്ങള്‍ എന്തൊക്കെയാണ് ? ശ്രവണ സഹായികളുടെ ഉല്പാദനവും ശബ്ദമലിനീകരണവും തമ്മിലുള്ള ബന്ധമെന്ത് ?
ചന്ദ്രനിലെ മണ്ണില്‍ക്കൂടി ശബ്ദത്തിന് സഞ്ചരിക്കാനാകുമോ ?
ഊജ്ജപ്രതിസന്ധി പരിഹരിക്കാന്‍ ഊര്‍ജ്ജം ലാഭിക്കുകയോ ഊര്‍ജ്ജം ഉല്പാദിപ്പിക്കുകയാണോ വേണ്ടത് “
“ മതി നിര്‍ത്ത് “ മാഷിന് ദേഷ്യം വന്നു
ട്യൂഷന്‍ മാഷ് എണീറ്റു നിന്നു
“ ഈ പഞ്ചായത്തിലും അതിനു ചുറ്റിലുമുള്ള പഞ്ചായത്തിലേയും സ്കൂളുകളിലെ കുട്ടികള്‍ എന്റെ ട്യൂഷന്‍ ക്ലാസില്‍ പഠിക്കാന്‍ വരുന്നുണ്ട് . അവര്‍ക്കൊക്കെ ഇത്തരം ചോദ്യം മൂലം പ്രശ്നം പറ്റിയിട്ടുണ്ട് . ചോതി , ട്രാന്‍സ്‌ഫോമറിന്റെ പ്രവര്‍ത്തന തത്ത്വം മ്യൂച്ചല്‍ ഇന്‍ഡക്ഷന്‍ , എര്‍ത്ത്
ലൈന്‍ , ശ്രുതി - ഗുണം , പിന്നെ ഡയോഡ് വെച്ചുള്ള ഗണിത പ്രശ്നം , ആര്‍മേച്ചറിന്റെ ത്രീഡി തിരിച്ചല്‍ , ഗ്രാഫിക് ചിത്രം ചേരും പടി ചേര്‍ക്കല്‍ ഇവയൊക്കെയാണ് അവര്‍ക്ക് എ പ്ലസ് നഷ്ടപ്പെടുത്തുന്ന ചോദ്യങ്ങള്‍ . അവര്‍ക്കെങ്ങാനും എ പ്ലസ് പോയാല്‍ .......... നമ്മുടെ ഇവിടത്തെ
ഏറ്റവും നല്ല ഹയര്‍ സെക്കന്‍ഡറി സ്കൂളായ ............... ല്‍ അഡ്‌മിഷന്‍ കിട്ടില്ല . അങ്ങനെ വന്നാല്‍ ....... ഈ സ്കൂളിലെയൊക്കെ പി ടി എ പ്രസിഡണ്ടുമാരൊക്കെ എനിക്കു പരിചയം ഉള്ളോരാ . അവരോടൊക്കെ ഈ സത്യം ഞാന്‍ പറയും . മാഷന്മാരും ടീച്ചര്‍മാരും പഠിപ്പിക്കാത്ത
ചോദ്യം വന്നോണ്ടാ ഫിസിക്സില് എ പ്ലസ് പോയേ ന്നുള്ള കാര്യം . അപ്പോ പിന്നെ തൊട്ട് ഫിസിക്സ് അദ്ധ്യാപകരുടെ ഗതി ...............”
ഭീഷണി മുഴുമിപ്പിക്കാതെ ട്യൂഷന്‍ മാഷ് സ്കൂട്ടര്‍ സ്റ്റാര്‍ട്ട് ചെയ്തു പോയി
പെട്ടെന്ന് മാഷിന്റെ മൊബൈല്‍ ഫോണ്‍ ശബ്ദിച്ചു
അങ്ങേതലക്കല്‍ കുസൃതിക്കുട്ടന്റെ അമ്മയാണ്
“ മാഷേ ഇന്നത്തെ മാതൃഭൂമി പത്രം വായിച്ചതുമുതല്‍ കുസൃതിക്കുട്ടന്‍ ഒറ്റ ഇരിപ്പാണ് . ഇന്നലെ ഫിസിക്സ് പരീക്ഷ കഴിഞ്ഞ് വന്നപ്പോള്‍ അവന് പറഞ്ഞത് എ പ്ലസ് കിട്ടുമെന്നാണ് . ഇപ്പോള്‍ അവന് പത്രത്തില്‍ പരീക്ഷയുടെ റിവ്യൂ വായിച്ചപ്പോള്‍ അവന് പറയുന്നു അവന് എ പ്ലസ്
ലഭിക്കില്ലാന്ന് . “
മാഷിന് ഒന്നും പറയാന്‍ കഴിഞ്ഞില്ല
വീണ്ടും ഫോണില്‍ കുസൃതിക്കുട്ടന്റെ അമ്മ പറഞ്ഞു
“ എനിക്ക് ഇപ്പോ പേടി അവന്റെ ഈ വെഷമം കെമിസ്‌ട്രി പരീക്ഷയെ ബാധിക്കുമോ എന്നാ ? എന്താ മാഷേ ഇങ്ങനെ ? ഇപ്പോഴത്തെ പരീക്ഷക്ക് കുട്ട്യോളെ പേടിപ്പിക്കണതും പറ്റിക്കണതുമായ ചോദ്യങ്ങള്‍ വരുമെന്നാണല്ലോ കുസൃതിക്കുട്ടന്‍ പറയണത് . അവനു മാത്രമല്ല അവന്റെ കൂട്ടുകാര്‍ക്കും ഇതു തന്ന്യാ അവസ്ഥാത്രെ . അവരടേം ഫിസിക്സില് എ പ്ലസ് പോയീത്രെ! ”
മാഷ് ഫോണ്‍ കട്ട് ചെയ്തു
മുരടനക്കം കേട്ട് തിരിഞ്ഞു നോക്കിയപ്പോള്‍ മാഷിന്റെ ഭാര്യ ചായയുമായി പൂമുഖത്തെത്തി നില്‍ക്കുന്നു
മാഷിന്റെ മുഖഭാവം കണ്ട് അവര്‍ പറഞ്ഞു
“ സംസാരമൊക്കെ ഞാന്‍ കേള്‍ക്കുന്നുണ്ടായിരുന്നു . കാര്യം എനിക്ക് മനസ്സിലായി “
മാഷ് ദയനീയ മായ രീതിയില്‍ ഭാര്യയെ നോക്കി
ഭാര്യ മാഷിനെ ആശ്വസിപ്പിച്ചുകൊണ്ട് പറഞ്ഞു
“ വെറുതെയല്ല ട്ടോ സര്‍ ഐസക് ന്യൂട്ടണ്‍ സ്കൂള്‍ പഠനകാലത്ത് പഠിത്തത്തില്‍ പിന്നോക്കമായത് .!!”
